ᖃᓅᖅ ᐱᓇᓱᒐᔭᕐᕿᑦ ᓴᓇᔨᐅᓂᐅᑉ ᐱᓇᓱᐊᒐᖓᑕ ᐃᓗᐊᓂ?
ᖃᐅᔨᒪᒋᐊᓕᓐᓂᒃ ᐱᑕᖃᕐᖁᖅ ᓅᒋᐊᖕᖏᓂᕐᓂ ᓴᓇᔩᑦ ᐱᓇᓱᐊᒐᖏᓐᓄᑦ! ᐊᓪᓚᓂᐊᓚᐅᕐᑕ ᑕᒪᑐᒪ ᒥᑦᓵᓄᑦ ᑕᑯᓗᑕᓗ ᐱᔪᓐᓇᐅᑎᖃᕐᒪᖔᕐᐱᑦ ᐃᓚᒋᓕᐅᑎᒍᑎᑦᓴᓂᒃ ᐱᓇᓱᑦᑎᕗᓐᓄᑦ!
ᐱᔭᕆᐊᖃᖅᑕᑎᑦ
1. ASP ᕿᔪᒐᖓ
ᐱᓇᓱᓚᖓᓗᓂ ᓴᓇᔪᓄᑦ ᓇᔪᕐᑕᐅᔪᒥ ᐱᓇᓱᑦᑎᐅᓗᓂ ᑯᐯᒃ ᓄᓇᖓᓂ, ᓯᕗᓪᓕᒥᒃ 30-ᓂᒃ ᑫᕙᓪᓚᒍᓯᕐᓂᒃ ᐃᓕᓐᓂᐊᕈᑎᖃᕆᐊᖃᕐᑐᑎᑦ ᓴᓇᔪᑦ ᓇᔪᕐᑕᖓᓂ ᐊᑦᑕᓈᕇᒃᑯᑎᓂᒃ. ᑕᒪᓐᓇ ᐃᓕᓐᓂᐊᓂᖅ ᐱᔭᕇᕐᐸᑦ, ᐱᓚᖓᔪᑎᑦ ASP ᕿᔪᒐᖓᓂᒃ ᐱᕕᑖᕈᑎᒋᓗᒍ ᐱᓇᓱᓐᓂᒥᒃ ᓴᓇᔪᑦ ᓇᔪᕐᑕᖓᓂ. ᑕᒪᓐᓇ ᐃᓕᓐᓂᐊᕈᑎ ᒪᓂᔭᐅᓲᖅ ᓄᓇᕕᒻᒥ ᐊᒥᓱᕕᑦᓱᓂ ᐊᕐᕌᒎᑉ ᐃᓗᐊᓂ ᐊᒥᓱᐃᓂ ᓄᓇᓕᓐᓂ.
ᖃᐅᔨᒪᒍᑏᑦ ᐅᓪᓗᓕᐅᕐᓯᒪᔪᓂᒃ ᐊᒻᒪᓗ ᖃᓄᖅ ᐃᓚᐅᔪᑦᓴᕈᕐᓂᒥᒃ:
ᐃᓄᒻᒪᕇᑦ ᐃᓕᓐᓂᐊᑎᑕᐅᓂᖓᓂᒃ ᐱᓇᓱᕝᕕᒃ KI-ᑯᑦ ᓄᓇᓕᓕᒫᓂ ᐃᓕᓴᕐᓂᓕᕆᕕᖓᓂ (ᑲᑎᕕᒃ ᐃᓕᓴᕐᓂᓕᕆᓂᖅ)
ᓴᓇᔩᑦ ᐱᓇᓱᕝᕕᖓ KRG-ᑯᓂ (ᑲᑎᕕᒃ ᓄᓇᓕᓕᒫᑦ ᑲᕙᒪᖓ)
ᐃᑉᐱᒍᓱᒋᑦ ᐃᑭᓐᓂᐹᖓᓄᑦ 16-ᓂᒃ ᐅᑭᐅᖃᕆᐊᖃᕋᕕᑦ ᑖᑦᓱᒥᖓ ᐃᓕᓐᓂᐊᕈᑎᖃᓚᖓᓗᑎᑦ.
2. CCQ-ᑯᑦ ᐱᔪᓐᓇᕈᑎᓂᒃ ᓇᓗᓀᕐᓯᐅᑎᖏᑦ
ᓇᓗᓀᒃᑯᑕᖅ ᑐᖓᓪᓕᖅ ᐱᑕᖃᕆᐊᖃᕐᒥᔪᖅ ᐱᓇᓱᓐᓂᐊᓗᓂ ᓴᓇᔪᑦ ᓇᔪᕐᑕᖓᓂ ᑌᓐᓇᐅᕗᖅ ᐱᔪᓐᓇᑐᒥᒃ ᓇᓗᓀᕐᓯᒍᑎ CCQ-ᑯᑦ ᓄᐃᓲᖓᑦ. CCQ-ᑯᑦ (Commission de la construction du Québec) ᓄᐃᑦᓯᓲᖑᕗᑦ ᐊᑦᔨᒌᑦᑎᖏᑦᑐᓂᒃ ᐱᔪᓐᓇᕈᑕᐅᔪᑦ ᕿᔪᒐᖏᓐᓂᒃ ᒪᓕᑦᑎᓗᒋᑦ ᖃᓄᐃᑦᑐᒥᒃ ᐱᓇᓱᑦᑎᐅᒍᒪᓂᕆᔭᒥᒃ (ᐃᓪᓗᓕᐅᕐᑎ-ᑲᓱᕐᑎᓯᔨ, ᐱᓇᓲᑎᕐᓚᓂᒃ ᐊᖁᑎ, ᒥᖑᐊᕆᔨ, ᐱᕐᓂᓕᕆᔨ, ᑭᑭᐊᕕᓂᕐᓂᒃ ᐱᓇᓱᑦᑎ, ᐊᓯᖏᓪᓗ) ᐊᒻᒪᓗ ᖃᓄᑎᒋᒃ ᐱᓕᓂᐅᓂᕆᔭᒥᒃ (ᐱᒋᐅᕐᓴᔪᑦ ᐅᕝᕙᓗᓘᓐᓃᑦ ᓇᓂᑐᐃᓐᓇᖅ ᐱᓇᓱᒍᓐᓇᓕᕐᑐᑦ).
ᐱᐅᓯᐅᓲᖅ ᐱᓚᖓᓗᓂ ᓯᕗᓪᓕᐹᒥᒃ CCQ-ᑯᑦ ᕿᔪᒐᖓᓂᒃ ᐊᑐᕆᐊᖃᓲᖑᕗᖅ ᐱᔪᒪᐅᑎᓕᐅᕐᓂᒥᒃ ᐱᓚᐅᕐᓗᓂ ᐱᓇᓱᑦᑎᐅᑉ ᐃᓕᓐᓂᐊᓯᒪᓂᖓᑕ ᐱᔭᕇᕈᑎᖓᓂᒃ ᐃᓕᖓᔪᒥᒃ ᐊᑕᐅᓯᕐᒧᑦ ᓴᓇᔨᐅᓂᐅᑉ ᐃᓗᐊᓂ ᐱᓇᓱᐊᒐᕐᒧᑦ. ᑌᒣᒐᓗᐊᕐᑎᓗᒍ, ᑌᒣᑦᑐᓂᒃ ᐃᓕᓐᓂᐊᕈᑎᓂᒃ ᐱᔭᕇᕐᓯᒪᖕᖏᑯᕕᑦ, ᐱᕕᖃᖏᓐᓇᑐᖅ ᐱᔪᓐᓇᕈᑎᒥᒃ ᕿᔪᒐᕐᑖᓂᕐᒥᒃ ᑐᑦᓯᕋᐅᑎᓕᐅᕐᓗᓂ CCQ-ᑯᓄᑦ ᒪᓕᑦᑎᖃᕐᑎᓗᒍ ᐱᓇᓱᒐᕐᒥᒃ ᐱᖕᖏᕖᕈᑎᒥᒃ ᐃᑭᓐᓂᐹᖓᓄᑦ 150-ᓂᒃ ᑫᕙᓪᓚᒍᓯᓕᐅᓚᖓᓗᑎᑦ ᐱᓇᓱᑦᑎᐅᓗᑎᑦ ᐃᓪᓗᓕᐅᕐᑐᒧᑦ. ᑌᒣᒻᒪᑦ ᐅᕙᑦᑎᓄᑦ ᑐᕃᓐᓇᓗᑎᑦ ᐅᖃᖁᓇᕐᖁᑎᑦ CCQ-ᑯᑦ ᕿᔪᒐᖓᓂᒃ ᐱᔪᒪᒍᕕᑦ ᐃᓕᓐᓂᒃ ᑕᒪᑐᒨᓇ ᒪᓕᓐᓂᐊᕋᑦᑕ. ᐱᓯᒪᓕᕈᕕᑦ ASP ᕿᔪᒐᖓᓂᒃ ᐊᒻᒪᓗ CCQ-ᑯᑦ ᕿᔪᒐᖓᓂᒃ ᓇᔪᕐᑎᒋᓕᕐᓗᒋᒃ, ᐊᑐᐃᓐᓇᐅᓕᕐᖁᑎᑦ ᐱᓇᓱᒍᓐᓇᓕᕐᓱᑎᑦ ᓴᓇᔪᑦ ᓇᔪᕐᑕᖏᓐᓂ!
3. ᐱᓕᓂᖕᖑᓴᕐᑐᖅ ᐅᕝᕙᓗ ᐁᑉᐸᕆᔭᐅᔪᖅ
ᓴᓇᔨᐅᓂᒃᑯᑦ ᐱᓇᓱᐊᒉᑦ ᐊᐅᓚᑕᐅᔪᑦ CCQ-ᑯᓄᑦ ᐊᑦᔨᒌᖕᖏᑐᓂᒃ ᐳᕐᑐᓂᖃᓲᖑᕗᑦ ᐱᓕᓂᖕᖑᓴᕐᑐᓄᑦ ᐃᓕᖓᔪᓂᒃ. ᐃᓘᓐᓈᒍᑦ, 3-ᓂᒃ ᐳᕐᑐᓂᓕᒃ ᐱᓕᓂᖕᖑᓴᕐᑐᑦ ᐊᕕᑦᑐᓯᒪᐅᑎᖏᓐᓂᒃ (1, 2 ᐊᒻᒪᓗ 3) ᐊᒻᒪᓗ ᑭᖑᓪᓕᐹᒥᒃ ᐳᕐᑐᓂᖃᕐᓱᓂ ᐃᓕᖓᔪᒥᒃ “ᐁᑉᐸᕆᔭᐅᔫᑉ” ᐊᕕᑦᑐᓯᒪᐅᑎᖓᓄᑦ.
ᑌᒣᓕᖓᒻᒪᑕ ᐱᓇᓱᒐᕐᓂᐅᕕᑦ ᐱᒋᐊᕋᔭᕐᑐᑎᑦ ᐱᓕᓂᖕᖑᓴᕐᑐᖅ 1 ᐱᒋᐊᕐᕕᒋᓗᒍ ᐊᒻᒪᓗ ᑫᕙᓪᓚᒍᓰᑦ ᓈᒻᒪᑐᑦ ᐱᓇᓱᑦᓯᒪᓕᕈᕕᒃᑭᑦ ᐱᓇᓱᕝᕕᒥ, ᓅᒐᔭᕐᓱᑎᑦ ᑭᖑᓪᓕᖓᓄᑦ ᐳᕐᑐᓂᕐᒧᑦ ᐊᒻᒪᓗ ᑌᒣᓘᓯᓗᑎᑦ ᑎᑭᕋᑕᕐᓗᑎᑦ ᓇᓂᑐᐃᓐᓇᖅ ᓴᓇᔨᐅᒍᓐᓇᑑᑉ ᐃᓕᑕᕆᔭᐅᒍᑎᖓᓄᑦ. ᐊᑐᓂ ᐳᕐᑐᓂᖏᑦ ᒪᓕᑦᑎᓖᑦ ᑫᕙᓪᓚᒍᓯᒃᑯᑦ ᐊᑭᓂᒃ ᐊᒻᒪᓗ ᑌᒣᒻᒪᑦ ᖃᐅᔨᒪᓇᕐᖁᑦ ᑮᓇᐅᑦᔭᓴᕈᑎᖏᑦ ᐊᒻᒪᓗ ᑕᒪᓐᓇ ᐊᑦᔨᒌᒻᒥᒐᓂ ᓯᕗᒧᐊᕐᓂᕆᔭᒥ ᐳᕐᑐᓂᕐᓴᒧᑦ ᓅᖃᑦᑕᓱᓂ.
ᑌᒣᒻᒪᑦ ᐱᒻᒪᕆᓪᓗᑑᕗᖅ ᑲᒪᑦᓯᐊᓗᓂ CCQ-ᑯᓂ ᐊᓪᓚᖁᑎᓯᓐᓂᒃ ᐃᑉᐱᒋᑦᓯᐊᓗᒋᑦ ᐊᒻᒪᓗ ᖃᐅᔨᑎᑦᓯᖃᑦᑕᓗᓂ ᐱᓇᓱᕝᕕᓂᐅᕕᑦ ᓱᓇᐅᓂᕋᕐᑕᐅᓃᑦ ᐊᓯᑦᔨᑐᐊᕐᐸᑦ ᑮᓇᐅᑦᔭᓵᑎᑦ ᐊᑭᑦᑐᕆᐊᕐᓂᐊᒪᑕ ᑕᒪᓐᓇ ᒪᓕᓗᒍ.
ᐃᓚᐅᒍᒪᕕᑦ ᓴᓇᔩᑦ ᐱᓇᓱᐊᒐᖓᓄᑦ?
ᑐᑭᓯᒋᐊᑦᓯᐊᕈᒪᒍᕕᑦ ᑕᑯᓂᐊᕈᓐᓇᒥᔪᑎᑦ CCQ-ᑯᑦ ᖃᕆᑕᐅᔭᓄᑦ ᐅᒃᑯᐃᕕᖓᓂᒃ ᖃᐅᔨᕕᒋᓚᖓᓗᒍ ᓱᓕᒋᐊᓪᓚᒃ ᐊᑦᔨᒌᖕᖏᑐᑦ ᐱᓇᓱᒉᑦ ᐊᑐᐃᓐᓇᐅᓲᑦ ᓴᓇᕕᐅᔪᓂ ᒥᑦᓵᓄᑦ.
